Bakalavriat. 5 kurs talabalar uchun

Oʼtkir mediastenit – koʼks oraligʼi kletchatkasining oʼtkir yiringli yalligʼlanishi. Uning paydo boʼlishiga, aksariyat hollarda koʼks oraligʼining ochiq jarohatlari, oʼtkir uchli yot jismlar vositasida teshilishi, kimyoviy moddalar taʼsirida kuyishi, baʼzan esa asbob-uskunalari yordamida tekshirishda jarohatlanishi yoki boʼyinning chuqur flegmonasining tarqalib ketishi sabab boʼladi.

Oʼtkir mediastenit umumiy va mahalliy simptomlarning jadal ri-vojlanishi bilan xarakterlanadi. Kasallik haroratning birdaniga 39-40°S darajagacha koʼtarilishi, gektik xarakterdagi isitma, et junjikishi, kuchli terlash bilan boshlanadi. Shu holatda nafas qisishi, sianoz, taxikardiya erta boshlanadi, arterial qon bosimi pasayadi, ogʼir intoksikatsiya belgilari namoyon boʼladi. Bemorlar odatda koʼkrak va boʼyin sohasidagi tortishadigan sanchiqli kuchli ogʼriqlarga shikoyat qiladilar. Boʼyinni egish va toʼgʼrilashda, boshni yon tomonlarga burishda, koʼkrakni bosishda ogʼriq kuchayadi. Bemorlar majburiy holatni egallaydilar (boshini oldinga qilib qaddini baland qoʼyib yotadilar). Qiziloʼngach, bronxlar teshilganda mediastinal, soʼngra esa teri osti emfizemasi vujudga keladi. Qon tahlilida yuqori leykotsitoz, leykoformulaning chapga siljishi, EChTning oshganligi maʼlum boʼladi. Rentgenogrammalarda koʼks oraligʼi koʼlankasining kengayganligi, ichi boʼsh aʼzolar teshilganda esa, koʼks oraligʼida gaz borligi qayd etiladi.

Muolaja tadbirlarini oʼtkazish bilan birga jarrohlik amaliyoti (operatsiya) qoʼllaniladi. Bundan maqsad infektsiya manbaini bartaraf etish, koʼks oraligʼini antiseptik eritmalar bilan doimiy yuvib turish uchun qoʼsh boʼshligʼli silikon naychalar bilan adekvat drenajlashdan iborat. Muolaja tadbirlari bakteriologik tekshiruvlar tahlili va nazorati ostida antibakterial muolaja, diurez stimulyatsiyasi Bilan birga detoksikatsion infuzion muolaja, hamda bemorning immunologik holatini quvvatlaydigan muolajalar oʼtkazishdan iborat.